Kulla e Dëshmorëve në Kompleksin Memorial “Dëshmorët e Kombit” në Gllogjan që nga mëngjesi i ka hapur dyert për vizitorët.
Dyert e hapura të Kullës së famshme në Dukagjin janë në shenjë të nderimit të Festave të Nëntorit.
Ndryshe, Shqipëria sot feston 111–vjetorin e shpalljes së pavarësisë. Më 28 Nëntor 1912, Ismail Qemali ngriti flamurin në Vlorë, duke shpallur Shqipërinë shtet sovran dhe të pavarur.
28 Nëntori nuk shënon vetëm festën e Ditës së Flamurit dhe ditëlindjen e komandantit legjendar, Adem Jashari. Sa herë vjen ky muaj, Kosova kujton daljen e parë në skenë të Ushtrisë Çlirimtare të Kosovës më 28 nëntor të vitit 1997 në fshatin Llaushë të Skenderajt.
Sot janë bërë 26 vjet që nga dalja e parë në skenë e Ushtrisë Çlirimtare të Kosovës (UÇK).
Sot, më 28 nëntor, shënohet po ashtu ditëlindja e komandantit legjendar, Adem Jashari, një figurë e shquar e Luftës së Pavarësisë në Kosovë. Nëse ai do të ishte gjallë, do të kishte mbushur 68 vjet. Adem Jashari, i lindur në Prekaz të Skenderajt më 1955, ishte djali i tretë i Shaban dhe Zahide Jasharit dhe mbaroi shkollën e mesme teknike në Skenderaj.
Përkundër shuarjes së të gjitha institucioneve të Kosovës në vitin 1990, Adem Jashari u organizua në aspektin ushtarak përmes LPK-së. Duke filluar me vitin 1991, ai dhe një grup veprimtarësh shqiptarë shkuan në Shqipëri për t’i kryer ushtrimet dhe stërvitjen e duhur ushtarake për luftën e armatosur.
Historia e heroit tonë shpërtheu në vitin 1997, me sulmin e UÇK-së në 12 stacionet policore.
Nga aksionet e armatosura kundër forcave policore që kryente UÇK-ja, pas shtimit të dhunës sistematike të forcave serbe nëpër Kosovë, kalohet në një fazë tjetër të ndeshjes së drejtpërdrejtë me forcat serbe, pra në beteja, në fundin e nëntorit 1997, kur në Rezallë të Re luftohet me forcat e shumta të policisë serbe.
Në këtë betejë i ndërpritet rruga kolonës së armatosur rëndë të forcave serbe, që kishin mësyrë një sulm në fshatin Vojnik, ku një ditë më parë, patrullat e maskuara të policisë serbe ishin gjuajtur me armë zjarri njërin prej luftëtarëve të hershëm të UÇK-së, Abedin Rexha – Sandokani.
Në këtë betejë printe Adem Jashari dhe luftëtarë të tjerë si Mujë Krasniqi, Rexhep Selimi, Sylejman Selimi, Ilaz Kodra, Ilaz Dërguti etj.
Kjo është beteja e parë dhe fitorja e njësitit të UÇK-së.