Kryetari i AAK-së, Ramush Haradinaj, ka kujtuar 25-vjetorin e masakrës së Poklekut dhe Çikatovës së Vjetër.
Përmes një postimi në Facebook, Haradinaj ka shkruar se drejtësia ende nuk është vendosur edhe pas 25 vjet pas Masakrës.
“Me dhembje në zemër, duke e ditur se drejtësia ende nuk është vendosur, 25 vjet pas Masakrës në Poklek të Drenicës, kur gjurmët e gjakut në bodrumin e Fadil Muqollit ende janë të freskëta, kujtojmë jetët e pafajshme të humbura e të rrëmbyera nga ata që tentuan të zhbijnë qenien dhe ekzistencën popullit shqiptar,” shkruan Haradinaj.
Tutje, Haradinaj ka shkruar se “Më 17 prill 1999, forcat serbe vranë dhe masakruan mbi 54 anëtarë të familjes Muqolli dhe Elshani, shumica prej tyre gra, pleq dhe fëmijë, duke filluar prej foshnjave 6 muajshe e deri te pleqtë 75 vjeçar. Në të njëjtën ditë, u vranë edhe 24 shqiptarë civilë në fshatin Çikatovë e Vjetër.”
“Duke kërkuar drejtësi për të rënët, qoftë i përjetshëm kujtimi për ta,” ka shkruar ai.