Analisti, Ylli Hoxha, i ftuar në emisionin “Debat Plus”, të mërkurën, ka folur lidhur me planin franko-gjerman, duke theksuar se Kosova duhet të jetë më këmbëngulëse, dhe sipas tij kjo këmbëngulje, mund të bëjë që ministrat të mos udhëtojnë për Amerikë apo shtete të tjera.
Sipas Hoxhës, ministrat duhet të ndjejnë gatishmërinë për ta bërë një gjë të tillë, sepse më vonë mund të ketë pasoja individuale, madje ka theksuar se mund të bjerë edhe qeveria.
“Ky është proces negociator me pasoja individuale, mund të bjerë edhe qeveria, mund të bjerë Kurti”, ka thënë Hoxha, duke shtuar se “Kosova nuk duhet të jetë rigjide, duhet të jetë rigjide me dhënë sovranitet ndaj Serbisë, kjo duhet të jetë parimi me të cilin nisemi”, ka thënë Hoxha.
Hoxha, ndër tjera, ka thënë se shtyerja e vendimit për targat dhe fillimi i bisedimit për asociacionin janë çështje problematike.
“Kujt po ja japim atë asociacion, ndaj kujt, ndaj një Serbie prodhuese. Kosova do të mundë të bisedonte për një nivel të autonomisë së serbëve, por ne nuk mund t’ia japim një territor të Kosovës, Serbisë”, ka thënë ai.
Ndërkaq, Hoxha ka thënë se çështja e targave nuk do ta prishë Kosovën me shtetet e tjera, e as shtetet e tjera me Kosovën.