Presidentja e Republikës së Kosovës, Vjosa Osmani-Sadriu ka pranuar çmimin “Gjergj Kastrioti” në Kalabri të Italisë me ç’rast, ka inauguruar edhe një shesh me emrin “Sheshi i Kosovës”. Ajo ka thënë se tashmë, në këtë të fundit gjendet një pjesë e Kosovës.
Me anë të një postimi të Facebook, Osmani ka shkruar se një çmim i tillë është mirënjohje për betejën historike të Kosovës për liri dhe jo vetëm.
“Arbëreshët, shtyllë e kulturës dhe e identitetit kombëtar! Mirënjohëse për mikpritjen vëllezërve e motrave arbëreshe. Për shekuj të tërë, ata e kanë ruajtur identitetin kombëtar e gjuhësor, traditën, ritet e kulturën e të parëve të tyre. Ideja e rilindjes kombëtare dhe historia e heroit tonë nacional, Gjergj Kastriotit, e gjejnë burimin në tokën e arbëreshëve. Falenderoj komunën e Frasnitës për çmimin “Gjergj Kastrioti”. Ky çmim është mirënjohje para së gjithash për betejën historike të Kosovës për liri dhe për ruajtjen e identitetit kombëtar. Po ashtu, në zemër të Arbërisë, në praninë e shumë arbëreshëve të Frasnitës, inauguram sheshin, i cili e mban emrin e Republikës sonë, sheshi “Kosova”. Nga sot, kemi një copëz Kosove në zemër të Kalabrisë!”, ka shkruar Osmani në Facebook.
Presidentja Osmani do ta ketë edhe një bashkëbisedim me studentët dhe mësimdhënësit e Universitetit të Kalabrisë.