Inspektorati Policor i Kosovës (IPK) ka dhënë detaje të reja në lidhje me incidentin e rëndë që ndodhi në fshatin Bibaj të Ferizajt, ku një person humbi jetën. Ngjarja ka ndodhur të premten, më 16 gusht 2024, rreth orës 19:30, në një restaurant ku po mbahej një ceremoni dasme.
Duke u bazuar në informacionet fillestare, IPK-ja njofton se zyrtari policor i dyshuar kishte shkuar në restaurantin ku po mbahej ceremonia dhe kishte shtënë me armë zjarri në drejtim të viktimës, e cila si pasojë e lëndimeve të pësuara ka ndërruar jetë.
“Hetuesit e Inspektoratit Policor të Kosovës (IPK) janë njoftuar nga Policia e Kosovës për një rast të gjuajtjes më armë zjarri në Ferizaj e ku dyshohej se ishte përfshirë edhe një zyrtar policor.
Me të pranuar informacionin hetuesit e IPK-së kanë dalë në vendin e ngjarjes së bashku me shumë njësi të tjera policore si dhe prokurorin kujdestar.
Incidenti raportohet të ketë ndodhur sot rreth orës 19:30 në fshatin Bibaj të Ferizajt në një restaurant ku ishte duke u mbajtur një ceremoni dasme.
Bazuar në informacionet fillestare dyshohet se zyrtari policor i dyshuar në këtë rast kishte shkuar në këtë lokacion dhe ka shtënë me armë zjarri në drejtim të viktimës i cili si pasojë e lëndimeve të pësuara ka ndërruar jetë”, thuhet në njoftim.
Pas kryerjes së veprës penale, zyrtari policor është vetëdorëzuar në Stacionin Policor të Ferizajt, ku ka dorëzuar armën e tij zyrtare, e cila dyshohet se është përdorur në ngjarje. Ai është arrestuar dhe suspenduar nga detyra, dhe me vendim të prokurorit, i është caktuar masa e ndalimit për 48 orë për dyshimin e veprës penale “Vrasja e rëndë”.
“I dyshuari në këtë rast (zyrtari policor) pas kryerjes së veprës penale është vetdorëzuar në Stacionin Policor të Ferizajt ku edhe ka dorëzuar armën zyrtare e cila dyshohet se është përdorur në këtë rast. I dyshuari është arrestuar (dhe suspenduar) dhe me vendim të prokurorit të njëjtit i është caktuar masa e ndalimit për 48 orë për shkak të dyshimit të veprës penale “Vrasja e rëndë” sipas Kodit Penal të Republikës së Kosovës.
Hetuesit e IPK-së në koordinim me Prokurorin e Shtetit dhe njësitet tjera policore do të vazhdojnë të ndërmarrin edhe shumë veprime të tjera hetimore drejt ndriçimit të rrethanave të këtij incidenti të rëndë”, thuhet më tej në njoftim.