Mosdekretimin e Blerim Isufajt në pozitën e Kryeprokurorit të Shtetit nga presidentja e Kosovës, Vjosa Osmani e ka cilësuar si një problem puro politik, Dibran Istrefi nga RTV Dukagjini.
Ai në emisionin “Debat Plus”, ka thënë se presidentja e vendit nuk dëshiron të bëjë këtë dekretim dhe është një çështje për shqyrtim.
“Problemi është që presidentja po pret të futet në fuqi ligji i ri për Këshillin Prokurorial, deri sa të zgjidhet ky problem nga Gjykata Kushtetuese, atëherë ky proces do të zvarritet”.
Sipas Istrefit, presidentja po blen kohë për një arsye të thjeshtë.
“Osmani nuk duhet të jetë përfillëse e politikave të Kurtit dhe ministrisë së drejtësisë”, ka vijuar Istrefi.
Ndërsa Kreshnik Gashi nga BIRN këtë situatë e ka cilësuar si të mjegullt.
Sipas tij, pesë muaj të mbetet vendi në pasiguri juridike dhe pa kryeprokuror është “një zvarritje e tejzgjatur e këtij procesi”.
Ai ka thënë se vërehet që ka tendencë që ky proces vazhdon të shtyhet deri sa të ketë rivlerësim të punës së kryeprokurorit.
“Jemi në pritje të një vendimi nga presidentja Osmani apo ta kthejë në shqyrtim te Këshilli Prokurorial”, ka thënë Gashi.
Ndërsa analisti Ylli Hoxha ka thënë se në aspektin kushtetues presidentja emëron dhe shkarkon kryeprokurorin, dhe nuk është vetëm si administratore por presidentja ka përgegjësi të shkarkojë dhe të emërojë në hierarkinë e shtetit.
“Ka të bëjë me një konsultim paraprak jo vetëm një nënshkrim, zonja Osmani dhe Kurti kanë ardhur me premtimin kyç, për luftimin e krimit dhe korrupsionit, prandaj edhe zgjatet ky proces”.
Ai ka thënë se nuk mund t’i drejtohet gishti presidentes dhe të lihet fajtore nëse nuk e dekreton një person që nuk e konsideron të duhur, sepse mandati i tij do të jetë shtatë vjeçar dhe do të jetë me rëndësi për sistemin e drejtësisë në Kosovë.