Shemsi Jashari, analist në FIVE në RTV Dukagjini, ka folur lidhur me moskonstituimin e Kuvendit të Kosovës.
Ai ka thënë se nga seanca e nesërme e Kuvendit nuk pritet ndonjë befasi, përveçse “një kreativiteti”.
“E vetmja gjë që mund të presim është një ‘kreativitet’, ku edhe më shumë delegjitimohet roli i Kuvendit, ku luhet me autoritetin e deputetëve dhe asgjë më shumë”, tha Jashari.
“Nuk ka asgjë për t’u befasuar në aspektin pozitiv. Nuk është duke u kërkuar zgjidhja, por vetëm elemente që fajësojnë subjektet e tjera politike”, shtoi ai.
Jashari ka theksuar se PDK nuk do të duhej të votonte asnjë kandidat të VV-së për kryetar të Kuvendit.
“Qoftë ai ish-ministër apo jo, nëse nuk ka një qasje serioze dhe të respektueshme nga Lëvizja Vetëvendosje. Nuk mund t’i befasosh deputetët me emra, duke i nxjerrë sikur të ishte ndonjë kuiz dhe jo një seancë e organizuar dhe e planifikuar për të bërë zgjidhje. Duke i ‘befasuar’ e duke mos u dhënë kohë as për të diskutuar emrin konkret për të votuar, kjo është një sjellje fëminore e z. Kurti, i cili po luan me autoritetin e Kuvendit. Unë mendoj se PDK është aq e pjekur sa të mos bie nën presionin e deklarimeve të mëhershme, se do ta votojmë dikë që s’ka qenë ministër. Nëse nuk respektohet procedura dhe nuk prezantohet si duhet kandidati, e nëse nxirren emra që më së paku do t’i bënin nder pozitës së kryetarit të Kuvendit, nuk do të duhej në asnjë rast të votoheshin”, u shpreh Jashari.
Ai shtoi se në rast se VV përsërit situatën e së dielës, PDK – përtej një premtimi, por edhe partitë e tjera politike – nuk duhet ta sakrifikojnë shtetin duke votuar një kandidat pa përvojë dhe pa bagazh.