Drejtoria e Administratës në Komunën e Prishtinës ka njoftuar se ka ndërmarrë një vendim lidhur me ndryshimin e orarit të punës me palë në Sektorin e Gjendjes Civile (SGJC) dhe në Qendrën për Shërbim me Qytetarë (QSHQ).
Përmes një postimi në Facebook, në bazë të vendimit, tashmë, orari i punës me palë në këto dy sektorë, do të fillojë nga ora 07:30 në mëngjes deri në orën 16:00, pasdite.
Vendimi do të hyjë në fuqi nga data 06 qershor 2022, e hënë.
“Duke e konsideruar numrin e madh të kërkesave për shërbime nga qytetarët e kryeqytetit, Drejtoria e Administratës ka marr këtë vendim, me qëllim të rritjes së kohëzgjatjes për shërbime si dhe mundësinë për ofrimin e shërbimeve për qytetarët që punojnë e nuk kanë pasur mundësi për paraqitjen e kërkesave të tyre në oraret e deritanishme”, thuhet në njoftim.
