Kryeparlamentari Glauk Konjufca ka uruar për 28 Nëntorin, Ditën e Pavarësisë së Shqipërisë.
Konjufca ka thënë se kjo datë na shfaq “nervin e gjallë të historisë, aty ku qartësohemi dhe vijmë në vete, ku përkatësia kombëtare shënohet vetvetishëm prej ndjenjës së përfshirjes në përpjekjet e panumërta për liri dhe përparim”.
“Nga kthimi i Gjergj Kastriotit, te Shpallja e Pavarësisë së Shqipërisë, ditëlindja e komandantit legjendar Adem Jashari e deri te lufta çlirimtare e UÇK-së, po ai flamur që valon”, ka shkruar Konjufca.
Konjufca ka thënë se 28 nëntori na mbledh të festojmë çka kemi arritur, çka gëzojmë falë heronjve, dëshmorëve dhe përpjekjeve sublime të popullit tonë, e njëherazi na thërret të zotohemi ndaj sakrificës dhe idealit të tyre për të shkuar përpara.
Sot Shqipëria festoi 111 vjet pavarësi. Por, në këtë 28 nëntor u kujtua edhe dalja e parë publike e Ushtrisë Çlirimtare të Kosovës në fshatin Llaushë të Skenderajt.
Lexo dhe këtë: 26 vjet nga dalja publike e UÇK-së në skenë
Ajo që bëri që UÇK-ja t’i bëjë publike aktivitetet e saj, ishte vrasja e mësuesit të shkollës së Llaushës, Halit Geci, dy ditë më parë nga forcat serbe.
Gjithashtu në këtë ditë ishte dhe ditëlindja e komandantit legjendar, Adem Jashari, i cili po të ishte gjallë sot do t’i mbushte 68 vjet.
Lexo dhe këtë: 28 Nëntori – ditëlindja e komandantit legjendar, Adem Jashari
Adem Jashari, i lindur në Prekaz të Skenderajt më 1955, ishte djali i tretë i Shaban dhe Zahide Jasharit. Ai mbaroi shkollën e mesme teknike në Skenderaj.