Anëtari i Partisë Socialdemokrate (PSD), Frashër Krasniqi, i ka quajtur mashtrues kryeministrin e Kosovës, Albin Kurtin, kryeparlamentarin Glauk Konjufca, dhe zëvendëskryeministrin e parë, Besnik Bislimi.
Krasniqi në Five në RTV Dukagjini i ka dhënë arsyet për secilin veç e veç, ku për Kurtin tha se vazhdimisht i ka ndërruar qëndrimet, dhe se asnjë prej tyre se ka mbajtur deri në fund.
“I pari mashtruesi më i madh, është Albin Kurti, i cili që në fillim pati deklaru që nuk shkojnë në dialog pa i plotësu Serbia 4 kushte, pastaj i pati vendos 4 parime tjera që hoqi dorë, pastaj tha që dialogu nuk është prioritet i imi. Pastaj vazhdoi duke thënë se Asociacion do të ketë por me 6 kushte, ato 6 kushtet u shkrinë dhe nuk përmenden, në fund tha nuk ka Asociacion por vetëmenaxhim, për të ardhur në fund duke thënë se ka Asociacion”, ka thënë ai.
Për Besnik Bislimin, ai e përmendi deklaratën ku kishte thënë se vetëm nëse diskutohej për Asociacionin, ai nuk do të ishte më pjesë e dialogut.
“Mashtruesi tjetër është Besnik Bislimi, që pati deklaru që nëse Asociacioni vetëm nëse diskutohet, ai nuk do të jetë më pjesë e dialogut. Në ditën që Qeveria diskuton për Asociacionin qoftë me kompetenca ekzekutive qoftë pa to, ai thoshte që nuk do të jem aty”, ka thënë ai.
Edhe Konjufca sipas tij i ka ndërruar qëndrimet, teksa përmendi deklaratën e tij ku kishte thënë se nuk do të ketë Asociacion as me kompetenca ekzekutive as pa to.
“Mashtruesi i tretë është Glauk Konjufca, i cili thoshte nuk do të ketë Asociacion as me kompetenca ekzekutive as pa. Ky ka qenë diskursi i VV-së, diskurs mashtrues”, tha ai.