Deputeti nga radhët e Lëvizjes Vetëvendosje, Adnan Rrustemi, ka reaguar pas arratisjes së Enver Sekiraqës, për të cilin Gjykata e Apelit kishte vendosur ta kthente Sekiraqën në paraburgim, pasi Themelorja më 3 maj ia kishte ndërprerë masën e arrestit shtëpiak duke e lënë të mbrohej në liri.
Me anë të një postimi në Facebook, Rrustemi e ka quajtur jo të rastësishme këtë rast.
Ai thotë se kjo është një shprehi e sistemit gjyqësor.
Rrustemi ka potencuar se derisa nuk do të ketë vetting në sistem, rastet e tilla do të mbesin mentalitet i punës.
“Fakti që befasohemi rast pas rasti me sistemin tonë gjyqësor si ky i djeshmi me arratisjen e Sekiraqës në fakt do të duhej të na bënte të reflektojmë pak më thellë. Kjo nuk është rastësi, por shprehi e këtij sistemi. Për aq kohë sa nuk do të ketë vetting në këtë sistem, këto raste nuk do të jenë më raste, por sistem e mentalitet i punës”, shkroi ai.