Kryeministri i Kosovës, Albin Kurti, ka deklaruar se Qeveria ka ndarë buxhet prej 102 milionësh për Ministrinë e Mbrojtjes dhe Forcën e Sigurisë së Kosovës.
Kjo shifër, siç deklaroi ai, shënon rritje prej 52 për qind të kësaj linje buxhetore në krahasim me vitin e kaluar.
“Synojmë që brenda mandatit të kësaj qeverie të arrijmë përqindjen prej 2 për qind të GDP që është një standard i pashkruar për vendet e NATO-s”, ka shtuar Kurti.
Sipas njoftimit nga Zyra e Kryeministrit, Kurti mori pjesë dhe ishte folës në seminarin e 102-të Rose-Roth i Asamblesë Parlamentare të NATO-s, me temën “Integrimi euro-atlantik i Ballkanit Perëndimor: sfidat e zgjatura, realitetet e reja dhe perspektivat e ardhshme.
Kryeministri Kurti gjatë fjalimit të tij ka përmendur edhe Ballkanin perëndimor si “regjion me shumë probleme të pazgjidhura”, duke thënë se jo vetëm që nuk është imun, por është tejet i cenueshëm në aspektin e stabilitetit dhe sigurisë.
Lidershipi politik i Serbisë, siç ka theksuar ai, ka maksimizuar mundësinë që i ka dhënë ndryshimi i ambientit strategjik të sigurisë, për të shtyrë përpara interesin e saj parësor për një Serbi si homogjeni regjionale.
Sipas tij, Kosova është shumë e qartë në orientimin e saj politik dhe strategjik drejt integrimit në strukturat euroatlantike.
Ai ka thënë se Qeveria e Kosovës ndër prioritetet e saj kryesore ka promovimin e vlerave demokratike, angazhimin diplomatik për përafrim me NATO-n dhe Bashkimin Evropian, si dhe ndërtimin e kapaciteteve të mbrojtjes në përputhje me standardet e NATO-s.
Gjithashtu, sipas kreut ekzekutiv, Qeveria e Kosovës ka qenë jashtëzakonisht e përkushtuar për të kompletuar aspektin ligjor për të mundësuar zhvillimin e FSK-së në përputhje me ushtritë e vendeve të NATO-s.