Është eurodeputeti nga Bullgaria, Andrey Kovatchev, nga grupi i Partisë Popullore Evropiane (EPP) ai i cili ka dhënë mbështetjen e tij për aplikimin e Republikës së Kosovës në Bashkimin Evropian.
Këtë e ka thënë vet Kovatchev përgjatë takimit të tij me Kryeministrin e Kosovës, Albin Kurti, bën të ditur Zyra e Kryeministrit.
“Eurodeputeti Kovatchev theksoi se heqja e regjimit të vizave për Kosovën duhet të vazhdojë pa vonesa, teksa kanë mbetur edhe pak hapa deri në përfundimin e këtij procesi. Ai po ashtu dha mbështetjen e tij të plotë për aplikimin e Kosovës në Bashkimin Evropian”, thuhet në njoftim.
Ky takim u realizua në kuadër të vizitës dyditore të Kurtit në Strasburg. I njëjti u shoqërua nga ambasadori i Kosovës në Bruksel, Agron Bajrami dhe zëvendësministri i Punëve të Jashtme dhe Diasporës, Kreshnik Ahmeti.
Krahas kësaj, bëhet e ditur se pjesë e bisedës ishte edhe takimi në Ohër i Kurtit me presidentin serb, Aleksandër Vuçiq, të shtunën.
Ndërkaq, Kryeministri i Kosovës, Albin Kurti, dhe presidenti i Serbisë, Aleksandër Vuçiq, të shtunën e 18 marsit do të zhvillojnë një takim të nivelit të lartë në Ohër të Maqedonisë së Veriut.
Kryeministri Kurti dhe presidenti Vuçiq tashmë kanë konfirmuar pjesëmarrjen e tyre në këtë takim.
Duke filluar nga ora 10:00, shefi i politikës së jashtme të Bashkimit Evropian, Josep Borrell, dhe i dërguari i BE-së për dialogun Kosovë-Serbi, Mirosllav Lajçak do të zhvillojnë takime të ndara me kryeministrin Kurti dhe me presidentin Vuçiq.
Më pas, do të zhvillohet një takim i përbashkët.
Pjesë e takimit do të jetë edhe i dërguari i posaçëm i Uashingtonit për Ballkanin Perëndimor, Gabriel Escobar.