Ministri i Punëve të Jashtme të Rusisë, Sergei Lavrov, gjatë së mërkurës ka takuar në Moskë, homologun e tij serb, Ivica Daçiq.
Pas këtij takimi, Lavrov ka thënë se Rusia i vlerëson marrëdhëniet me Serbinë.
“Ne vlerësojmë marrëdhëniet që po zhvillohen ndërmjet Federatës Ruse dhe Serbisë. Toni i këtyre marrëdhënieve vendoset nga kontaktet e rregullta mes presidentëve tanë Putin dhe Vuçiq. Jemi të kënaqur me mënyrën se si po zbatohen marrëveshjet në sferën materiale, tregtinë, investimet, shkëmbimet humanitare, si dhe në fushën e bashkëpunimit sportiv”, ka thënë Lavrov.
Ndërsa, Daçiq ka thënë se Serbia i është mirënjohëse Rusisë për mbështetjen që i jep.
“Përkrahja që na jepni në lidhje me Kosovën është shumë e rëndësishme për ne dhe dëshiroj t’ju falënderoj personalisht për mirëkuptimin dhe mbështetjen tuaj të madhe sa herë që ju drejtohemi për ndihmë. Jam mirënjohës për ndihmën në mbajtjen e seancës urgjente të Këshillit të Sigurimit të OKB-së për Kosovën dhe për propozimin për të mbajtur një seancë me rastin e 25-vjetorit të bombardimeve të NATO-s në Jugosllavi”, ka thënë Daciq, shkruajnë mediat serbe.
Lavrov dhe Daçiq do të ndjekin një ndeshje miqësore të futbollit mes dy kombëtarëve.