Kryetari i Lidhjes Demokratike të Kosovës, Lumir Abdixhiku, ka njoftuar se më 19 nëntor do të thërrasë Kuvendin e dhjetë Zgjedhor të kësaj partie.
Abdixhiku përmes një postimi në rrjetin social “Facebook”, ka theksuar se në po të njëjtën ditë e thërret edhe anëtarësinë në ngjarjen “e madhe të Konventës Programore ‘Rruga e Re’”.
“Në cilësinë e kryetarit të Lidhjes Demokratike të Kosovës, sipas kompetencave të përcaktuara me nenin 17 të Statusit të LDK-së, thërras Kuvendin X Zgjedhor të Lidhjes Demokratike të Kosovës me datë 19 nëntor 2023. Le të ketë festë! Le të ringritemi si një”, tha Abdixhiku.
Ndryshe, Lumir Abdixhiku ishte zgjedhur kryetar i LDK-së më 14 mars të vitit 2021, pas zgjedhjeve të jashtëzakonshme të LDK-së.
Abdixhiku kishte mandat të shkurtër dyvjeçar, ndërsa tash do të synojë mandatin e plotë katërvjeçar si kryetar i partisë opozitare.