Anëtarja e LDK-së, Jehona Lushaku, e ka kritikuar Qeverinë e Kosovës, duke thënë se ka krijuar komoditet, edhe pse nxënësit nuk janë duke e vijuar mësimin që gati pesë javë.
Ajo ka kërkuar nga ekzekutivi që sa më shpejt ta gjejnë në zgjidhje në mënyrë që sektori i arsimit të normalizohet.
“Ky komoditet që e ka marrë si të mirëqenë Qeveria Kurti II nuk i takon asnjë qeverie në botë, prandaj, duhet të prodhohet një zgjidhje e menjëhershme që shkollat të hapen dhe nxënësit t’i kthehen procesit mësimor dhe kërkesat e mësimdhënësve të adresohen në mënyrë urgjente”, ka theksuar Lushaku.
“Kjo situatë është sepse Qeveria e Kosovës nuk është e gatshme të gjejë një zgjidhje për ta dhe ta mundësojë fillimin e procesit mësimor për ta”.
Sipas Lushakut, asnjëherë në historinë e Kosovës nuk ka ndodhur që shkollat të jenë të mbyllura për një periudhë kaq të gjatë.
Tutje, ajo ka thënë se nuk ka asnjë justifikim që një situatë e tillë ende të mbizotërojë.
“Kjo situatë është për një ego të një kryeministri, i cili nuk dëshiron të dialogojë e të gjejë zgjidhje, por gjen fuqinë për t’i tallur mësimdhënësit dhe kërkesat e tyre”.