Në Komisionin për Çështjet Ligjore dhe Politikën e Jashtme në Shqipëri janë duke u zhvilluar diskutimet e fundit për projektligjin midis Italisë dhe Shqipërisë për azilkërkuesit që mbërrijnë në brigjet italiane.
Supozohej që diskutimi dhe miratimi në Parlament i këtij projektligji të shkonte në seancën e fundit për këtë vit, më 21 dhjetor, por sipas informacioneve të fundit, sugjerohet se diskutimi i këtij projektligji do të ndodhë këtë të enjte në seancë plenare.
Javën e shkuar Qeveria italiane e çoi në Parlament këtë projektligj dhe mori miratimin.
Për sa i përket Parlamentit të Shqipërisë kërkohet një shumicë e thjeshtë votash për ta miratuar, pra nuk priten surpriza këtë të enjte për miratimin e këtij projektligj.
Dy partitë demokratike, ajo e Berishës dhe e Lulzim Bashës, këtë projektligj e kanë ankimuar në Gjykatë Kushtetuese pasi ka elementë antikushtetues, shkruan TopChannel.
Ndryshe, më 6 nëntor, kryeministri Edi Rama dhe kryeministrja italiane, Giorgia Meloni, nënshkruan në Romë marrëveshjen për ndërtimin në Shqipëri të dy qendrave për strehimin e emigrantëve.
Sipas marrëveshjes për emigrantët, porti i zbarkimit do të jetë Shëngjini, ndërsa Gjadri do të jetë kampi ku do të ndërtohet vendqëndrimi i tyre.
Kapaciteti maksimal i numrit që do të presë qendra në Shqipëri nuk mund të jetë më shumë se 3 mijë emigrantë në muaj.