Pika më e ngarkuar kufitare për dalje nga territori i Kosovës vazhdon të jetë Merdari.
Të enjten e 25 gushtit, Raporti i Qendrës Kombëtare për Menaxhim Kufitar, ka njoftuar për kolonat dhe pritjet e gjata në pikat kufitare, të cilat bëjnë lidhjen mes Kosovës dhe Serbisë.
Pritjet më të gjata janë regjistruar në pikat kufitare në Merdar, Dheu i Bardhë dhe Mutivodë.
Në dalje të pikës kufitare në Merdar, pritjet janë nga 240-260 minuta, kurse kolona e automjeteve raportohet të jetë 1800 metra.
Ndërkaq, në dalje të pikës kufitare te Dheu i Bardhë, pritjet janë deri në 70 minuta, ndërsa kolona e automjeteve është deri në 500 metra.
Kurse në dalje të pikës kufitare në Mutivodë, pritjet janë deri në një orë dhe kolona e automjeteve në dalje të kësaj pikë është 200 metra.
Përveç këtyre pikave kufitare, në Muçibabë dhe Jarinje, pritjet për dalje nga territori i Kosovës janë 10 deri në 15 minuta.
Sa i përket pikave të tjera kufitare, pritjet nuk janë të gjata, po ashtu nuk raportohet të ketë kolona të gjata të automjeteve.
