Më 28 shkurt protestohet në Prishtinë kundër vendimit të Apelit për kthimin në rigjykim të rastit të vrasjes së Marigona Osmanit

Kolektivi për Mendim dhe Veprim Feminist ka bërë thirrje për protestë në raport me vendimin e fundit të Gjykatës së Apelit, me të cilin e kthen në rigjykim rastin e vrasjes së 18-vjeçares nga Ferizaj, Marigona Osmani

Foto e marrë nga Kolektivi për Mendim dhe Veprim Feminist.

Kolektivi për Mendim dhe Veprim Feminist ka bërë thirrje për protestë në raport me vendimin e fundit të Gjykatës së Apelit, me të cilin e kthen në rigjykim rastin e vrasjes së 18-vjeçares nga Ferizaj, Marigona Osmani.

Protesta është paralajmëruar të mbahet të mërkurën me datë 28.02.2024 në orën 12:00, në Pallatin e Drejtësisë në Prishtinë, pranë Gjykatës së Apelit.

Kolektivi për Mendim dhe Veprim Feminist e ka quajtur vendimin e Gjykatës së Apelit si të paqartë dhe jo të plotë.

“Gjykata e Apelit në vendimin e saj bie pre e vetë kritikës së saj sepse nuk është e qartë dhe e plotë në vlerësimin e aktgjykimit” – thuhet në njoftim.

Tutje, vendimi i Apelit, përmes njoftimit, është quajtur si pasqyrë e problemeve të thella e sistematike të trajtimit institucional të jetës së grave.

“Ne jemi të indinjuar/a dhe të revoltuar/a me këtë vendim të Gjykatës së Apelit që pasqyron një problem më të thellë sistemi dhe neglizhimin të theksuar institucional të jetëve të grave” – thuhet në njoftim.

Gjykata e Apelit, me vendimin e publikuar më datën 23.02.2024 ka kthyer çështjen në zero, duke e rrëzuar aktgjykimin e Gjykatës së Ferizajt, me të cilin Dardan Krivaça ishte dënuar me burgim të përjetshëm për vrasjen e Marigona Osmanit, kurse për ndihmë në kryerjen e vrasjes Arbër Sejdiu ishte dënuar me 15 vjet burgim.

Më datën 22.08.2021, trupi i pajetë i 18-vjeçares Marigona Osmani ishte dërguar në Emergjencën e Spitalit të Ferizajt nga dy persona, të cilët më pas ishin larguar shpejt nga aty.

Dy ditë pas ngjarjes, policia kishte arritur ta arrestonte të dyshuarin kryesor – Dardan Krivaçën. Sipas Prokurorisë, pos Krivaçës, në vrasjen e 18-vjeçares kishte kontribuuar edhe Arbër Sejdiu.

Krivaça e Sejdiu u akuzuan për vrasjen e Marigona Osmanit, e për këto akuza u gjykuan nga Gjykata e Ferizajt.

Krivaça ishte akuzuar edhe për dhunim, kurse Sejdiu për ndihmë në kryerjen e dhunimit, por që nga këto akuza u liruan që të dy.

Drejtësisë iu deshën gati dy vjet nga vrasja e Marigona Osmanit që rastit t’i japë epilog në shkallë të parë.

Sipas konstatimit të Prokurorisë, në korridor të banesës së të pandehurit ka pasur të vendosur një kamerë sigurie, e cila regjistronte 24 orë e që ka xhiruar edhe momente të ngjarjes.

Në aktakuzë theksohet se Prokuroria e ka konsideruar videon të besueshme dhe ngjarja është regjistruar prej datës 19.08.2021.

Prokuroria e Ferizajt pretendon në aktakuzë se dy të pandehurit e kanë goditur viktimën me shkop.

“Me dashje dhe në bashkëkryerje, me qëllim të fshehjes së veprës penale dhunimi e privojnë nga jeta tani të ndjerën Marigona Osmani, me të cilën i pandehuri i parë ishte në bashkësi jashtë martesore, në atë mënyrë që në intervale kohore nga ora 10:56 deri në orën 14:43, i pandehuri i parë merr një shkop, e së bashku me të pandehurin e dytë hyjnë në dhomë dhe e godasin në pjesë të ndryshme të trupit, me ç’rast të njëjtës i shkaktojnë, dhimbje të mëdha fizike dhe psikike, ku nga goditjet pëson politrauma-lëndime të shumëfishta, ku vdekja shkaktohet drejtpërdrejtë nga asfiksia mekanike, si dhe shoku hemorragjik dhe traumatik, të cilat janë pasojë e gjakderdhjes së jashtme dhe gjakderdhjes së brendshme, nga thyerje e ashtit të nofullës së poshtme, thyerje e brinjëve, klavikulës së majtë, unazave të qafës, gjakderdhjes epidurale dhe subdurale në pjesën e pasme të trurit të madh dhe në trurin e vogël, këputje parciale të palcës së kurrizit në qafë, të njëjtën e dërgojnë në Spitalin e Përgjithshëm – Qendrën Emergjente në Ferizaj dhe largohen nga aty” – thuhet në aktakuzë.

Shija e redaktorit

Policia konfirmon arrestimin e Akil Gjakovës

Policia e Kosovës, ka arrestuar xhudistin Akil Gjakova, si të dyshuar për veprën penale dhunë në familje. Lajmin për Portalin Dukagjini e ka konfirmuar zëdhënësi...

Rama e quan “hap historik” votimin Pro anëtarësimit të Kosovës...

Kryeministri i Shqipërisë, Edi Rama, e ka konsideruar si hap historik votimin e Asamblesë Parlamentare të Këshillit të Evropës(KiE) që i hap rrugë anëtarësimit...

Kurti: Me Kosovën aty, KiE fiton një demokraci të re...

Kryeministri i Kosovës, Albin Kurti, ka reaguar pasi Asambleja Parlamentare e Këshilli të Evropës ka votuar “për” anëtarësimin e Kosovës në këtë organizatë. Përmes një...

Të fundit nga rubrika