Me thirrjet “Nuk dua lule, po dua kontratë pune” dhe “Poshtë Patriarkati”, “Sot marshojmë, përditë luftojmë”, kolektivi “Marshojmë s’festojmë”, ka nisur protestën në kërkim të respektimit të të drejtave të grave në Kosovë.
Protesta ka nisur nga sheshi “Zahri Pajaziti”, dhe pritet të vazhdojë deri te ndërtesa e Qeverisë së Kosovës.
Protestuesit kanë hedhur bojë të kuqe me thirrjen “Poshtë policia patriarkale” në Stacionin Policor në Prishtinë.
Protestuesit gjithashtu janë dëgjuar edhe duke kërkuar dënime maksimale për vrasësit, dhunuesit dhe ngacmuesit e grave, dhe për më shumë siguri për gratë në ambientet publike dhe private.
Një prej thirrjeve të protestuesve ishte “Duda ku i ki kufijtë”, referuar deputetes Duda Balje për kundërshtimin e saj ndaj Kodit Civil.
Ndërsa, janë dëgjuar edhe porositë: “Poshtë racizmi” e “Poshtë homofobia”.
Përkundër herëve të tjera që marshi ka vazhduar deri në hyrje të Qeverisë, këtë herë është penguar nga Policia e Kosovës.
Kujtojmë se, protesta të ngjashme janë mbajtur edhe vitet e kaluara në Kosovë, në datën e njëjtë – 8 Mars – kur shënohet Dita Ndërkombëtare e Gruas.