Ministri i Financave, Hekuran Murati në lidhje me mosekzekutimin e pagave për mësimdhënësit ka thënë se është një proces që shkon në përputhje me rregulloren e brendshme të thesarit dhe Ministrisë së Financave gjersa ka shtuar se punëtorët me të hyrë në grevë do të duhej ta kishin të qartë se “nuk do të paguhen pa punuar”.
Ai ka thënë se komunat duhet të dorëzojnë listat që e konfirmojnë kompensimin e orëve të humbura mësimore nëse dëshirojnë ekzekutim të pagave.
Murati ka thënë se paraja publike duhet të sigurohet se shpenzohet sipas ligjeve.
“Shpenzimi i parave publike thotë që paratë publike do të miratohen vetëm nga fondet e alokuara në përputhje me aktet ligjore”.
Sipas tij, Ministria e Financave dhe thesari parandalon kur ka kërkesa që të bëhen shpenzime kundër ligjeve.
“Ligji për grevat e thekson qartë se në kohën kur punëtorët janë në grevë pra nuk mund të paguhen pa punuar”.
Ndërsa për këtë, Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, ka thënë se qeveria nuk është punëdhënës i personelit paraunversitar, por siç thotë ai, punëdhënësi me ligjin për vetëqeverisje lokale, këtë përgjegjësi e ka komuna.
Tahiri për mosekzekutimin e pagave: Po bëhet një ndëshkim kolektiv