Prokuroria Themelore e Prishtinës ka nisur hetimet ndaj Dr. Betim Morinës për dëmtim të pronës së Qendrës Kombëtare të Kosovës për Transfuzionin e Gjakut.
Më datë 18.10.2023, u publikua një video ku shihej mjeku i QKKTGJ, Betim Morina, duke dëmtuar derën e një zyre të këtij institucioni. Sipas burimeve të dukagjini.com, Prokuroria Themelore në Prishtinë ka nisur hetimet penale ndaj Dr. Morinës për përfshirjen e tij në këtë akt vandal.
Incidenti, që ndodhi më 20.03.2023, pasoi një shkëmbim mesazhesh mes Dr. Morinës dhe një anëtareje të stafit të QKKTGJ-së, A.G., e cila i kishte kërkuar Dr. Morinës të mos e shqetësonte për zyrën sepse ajo ishte përcaktuar të punonte në atë zyrë nga menaxhmenti.
Pavarësisht se Dr. Morina kishte një zyrë tjetër të caktuar, ai tentoi të hapë dhunshëm derën e zyrës së A.G. pa verifikuar nëse ishte dikush brenda, duke e dëmtuar atë në përpjekje për ta hapur.
A.G. nuk ishte në zyrë atë ditë për shkak të shëndetit jostabil.
Pas incidentit, ajo u këshillua nga kolegët të mos dilte në punë, pasi Dr. Morina kishte tentuar të hynte me forcë në zyrën e saj. Sjellja e tij shkaktoi shqetësim te stafi i pranishëm.
Burimet e Dukagjinit bëjnë të ditur se prokuroria ka autorizuar hetime për të sqaruar rrethanat e rastit dhe përgjegjësinë eventuale penale të Dr. Morinës.
Ky nuk është rasti i vetëm penal për të cilin Prokuroria Themelore është duke e hetuar Dr. Betim Morinën. Ai gjithashtu po hetohet për një rast të mëparshëm të sulmit fizik dhe lëndimit të rëndë trupor që ndodhi në objektin e QKKTGJ-së në tetorin e vitit të kaluar. Për këtë rast, Dr. Morina, si i dyshuar, u arrestua dhe qëndroi në paraburgim për 48 orë dhe më pas në arrest shtëpiak për një muaj.