Presidentja e Kosovës, Vjosa Osmani, e ka ritheksuar vlerësimin e shtetit të Kosovës ndaj Sllovenisë.
Ajo pas takimit me zëvendëskryeministren dhe ministren e Punëve të Jashtme të Sllovenisë, znj. Tanja Fajon, tha se “Sllovenia mbetet një nga aleatet më të rëndësishme të popullit të Kosovës”.
Osmani tha se me Fajon kanë diskutuar për mundësitë e bashkëpunimit ndërshtetëror.
“Sot, bashkë me zëvendëskryeministren dhe ministren e Punëve të Jashtme të Sllovenisë, znj. Tanja Fajon, diskutuam për thellimin e bashkëpunimit ndërshtetëror si dhe përpjekjet tona të përbashkëta për paqe dhe stabilitet në Ballkanin Perëndimor”, ka thënë ajo.
Fajon gjatë ditës u takua me ministren e Punëve të Jashtme të Kosovës, Donika Gërvalla.
Po ashtu, ajo pritet të takohet me kryeministrin Albin Kurti dhe kryeparlamentarin Glauk Konjufca.