Presidentja e Kosovës, Vjosa Osmani ka vizituar Klinën, Skënderajn dhe Mitrovicën pas vërshimeve të fundit në Kosovë.
Në këtë takim, presidentja Osmani është takuar me kryetarin e Klinës, Zenun Elezaj, kryetarin e Skenderajt, Fadil Nura, dhe me kryetarin e Mitrovivcës, Bedri Hamza.
“Presidentja Osmani ka theksuar se që nga mbrëmë ka mbajtur kontakte të vazhdueshme me institucionet e sigurisë dhe në këtë kontekst ka vlerësuar angazhimin e strukturave komunale dhe institucioneve emergjente për të ndihmuar qytetarët dhe për t’i minimizuar dëmet në ekonomi familjare”, thuhet në njoftimin e Presidencës.
Presidentja Osmani ka theksuar se institucionet qendrore do të angazhohen për t’i mbështetur komunat e prekura nga vërshimet.
Po ashtu, presidentja Osmani ka vizituar biznese dhe ekonomi familjare, të cilat kanë pësuar nga vërshimet.
“Falënderoj Forcën Sigurisë së Kosovës, Policinë e Kosovës, Zjarrfikësit, autoritetet komunale dhe të gjithë ata, të cilët ndodhen në terren në zonat më të rrezikuara, në gatishmëri të plotë për t`u ofruar ndihmë qytetarëve dhe për ta mbrojtur secilën jetë”, është shprehur presidentja Osmani.
Presidentja Osmani në këto tri komuna ka ofruar mbështetjen institucionale dhe ka potencuar se “jeta, shëndeti dhe pronat e qytetarëve, janë prioritet absolut, ndaj nevojitet angazhim dhe solidaritet i të gjithëve në një situatë të tillë”.