Ish-ambasadori i Kosovës në Suedi, njëherësh drejtori i Institutit KIPRED, Lulzim Peci, lidhur me zgjidhjen e situatës aktuale për targat ilegale, ka thënë se në bisedimet në Bruksel duhet të përfshihet edhe NATO.
Me anë të një postimi në Facebook, Peci ka deklaruar se tolerimi i Serbisë me paramilitarë dhe kërcënime ushtarake në veri të Kosovës, vetëm sa e dobëson kredibilitetin e NATO-s, dhe më së shumti i bën shërbim Rusisë.
“Për të zgjidhur situatën e tanishme, në negociatat në Bruksel duhet të kyçet edhe NATO-ja, sepse zgjidhja e çështjes së targave, duke pasur paramilitarë të Serbisë në veri, nuk ofron zgjidhje, por do të ishte vetëm një iluzion”, ka shkruar Peci.
Sipas tij, formimi dhe operimi i “Brigadës së Veriut” në Veri të Kosovës, me “gjeneral Radojçiqin” në krye, është një shkelje blatante e marrëveshjes së Kumanovës dhe vetë Rezolutës 1244.
Ai ka thënë se Kosova duhet të ketë në plan të parë sigurinë e qytetarëve në veri, sidomos që deri më tani nuk ishte në gjendje t’i mbrojë ata që i konvertuan targat në RKS.
“Kjo siguri, dhe me këtë edhe forcimi i rendit e ligjit e sovranitetit, nuk mund të arrihet pa plan të përbashkët me SHBA dhe BE-në”.
Po ashtu, ai ka potencuar se prezenca e KFOR-it nuk është në shërbim të agjendave ditore të Qeverisë së Kosovës, por për ruajtjen e paqes dhe sigurisë në vend.
“Kur këto agjenda koincidojne njëra me tjetrën, është dëshmuar se situatat janë zhvilluar në dobi të Kosovës”.