Presidenti i Ukrainës, Volodymyr Zelensky, ka thënë se Ukraina ka një sasi të drithërave prej 10 miliardë dollarësh në dispozicion për shitje. Kjo sasi është në kuadër të marrëveshjes së nënshkruar me Rusinë për t’i zhbllokuar furnizimet.
Presidenti ukrainas për mediat e huaja ka thënë se përafërsisht 20 milionë tonë të të korrave të drithit të vitit të kaluar do të eksportohen.
Ukraina, Rusia, Turqia dhe OKB-ja të premten e 22 korrikut kanë nënshkruar marrëveshje në Stamboll për t’i rihapur portet ukrainase të Detit të Zi për eksportet e grurit.
Kjo marrëveshje mes shteteve ka ndikuar në rritjen e shpresave se kriza globale ushqimore do të lehtësohet.
Zelensky ka thënë se kjo marrëveshje është një demonstrim i radhës se Ukraina mund t’i rezistojë luftës.
“Në këtë kontekst, i jam veçanërisht mirënjohës Sekretarit të Përgjithshëm të OKB-së dhe presidentit turk Rexhep Tajip Erdogan për përpjekjet e tyre”, ka thënë presidenti i Ukrainës, Zelensky.