Presidentja e Kosovës, Vjosa Osmani, ka ftuar partitë politike për një takim të rëndësishëm në fund të këtij muaji.
Sipas burimeve të afërta me televizionin Dukagjini, tema e këtij takimi do të jetë caktimi i datës për zgjedhjet e ardhshme dhe do të mbahet më 31 korrik.
Bazuar në Kushtetutë dhe Ligjin për zgjedhjet e përgjithshme, zgjedhjet e rregullta në vend duhet të mbahen në shkurt të 2025.
Deri më tani, zgjedhjet e parakohshme i kanë dashur të gjitha partitë (LVV, PDK, LDK e AAK), por nuk kanë mundur të gjejnë një konsensus se si të arrijnë deri te to.
Në maj të këtij viti, Partia Demokratike e Kosovës ishte e pajtimit që në zgjedhje të shkohet përmes shpërndarjes së Kuvendit, por jo edhe Lidhja Demokratike e Kosovës dhe Aleanca për Ardhmërinë e Kosovës. LDK-ja e AAK-ja dëshironin fillimisht dorëheqjen e kryeministrit Albin Kurti.