Gjyqtari i Procedurës Paraprake të Gjykatës Speciale, Nicolas Guillou, ka miratuar kërkesën e Prokurorisë Speciale të Hagës për amandamentimin e aktakuzës së konfirmuar ndaj ish-presidentit të Kosovës, Hashim Thaçi dhe të tjerëve.
Prokuroria Speciale ka kërkuar që nga aktakuza të hiqen pretendimet për krime në qytetin e Ferizajt, si rrjedhojë e pamjaftueshmërisë së provave.
“Prokuroria Speciale kërkon leje për të ndryshuar aktakuzën e Konfirmuar, që të hiqen pretendimet për krime të kryera kundër të paktën një viktime ndërmjet rreth [Redaktuar] 1999 në një shtëpi ose rreth Ferizajt. Prokuroria Speciale e Hagës shpjegon se ka vendosur të mos mbështetet në provat e [Redaktuar] dhe se konsideron se tani nuk ka prova të mjaftueshme për të vërtetuar pretendimet e Ferizajt”, thuhet në dokumentin e publikuar në faqen e Dhomave të Specializuara.
Gjyqtari i Procedurës Paraprake ka miratuar kërkesën e Prokurorisë së Hagës dhe ka urdhëruar të njëjtit që të tërheqin pretendimet e cekura rreth një krimi të pretenduar në Ferizaj.
“Aktakuza e konfirmuar e ndryshuar do të ngrihet deri të premten, 30 shtator 2022”, thuhet në vendim.
Gjykatësi i procedurës paraprake, Nicolas Guillou, kishte aprovuar pjesërisht mocionin e mbrojtjes së ish-presidentit Hashim Thaçi, të parashtruar ndaj aktakuzës së ndryshuar në rastin ku ai krahas Kadri Veselit, Jakup Krasniqit e Rexhep Selimit, akuzohen për krime lufte. ZPS ishte urdhëruar të bëjë ndryshime në aktakuzën e ndryshuar, transmeton BD.
Ndërkaq, prokuroria po pretendon se katër të akuzuarit kanë kryer krime lufte edhe në Gjilan, Budakovë e Semetishtë.