Dje (e shtunë) veteranët e Ushtrisë Çlirimtare të Kosovës protestuan nga ora 18:00, në Prishtinë.
Në lidhje me këtë protestë, shumë vetura të Policisë së Kosovës me dhjetëra pjesëtarë dhe ekipe të zjarrfikësve u vendosën në oborrin ndërmjet Kuvendit dhe Qeverisë.
Në këtë protestë qindra qytetarë u mbledhën në sheshet e Prishtinës, në të cilat mbizotëronin flamujt kuq e zi dhe këngët patriotike shqiptare.
Protestuesit në disa raste borhoritën “Poshtë Qeveria”, kurse, “Mimozë: A t’kallxoj “Radoja” se ku janë 1600 të zhdukurit e luftës”, “Mimozë: Ti fyej veteranët e Jabllanoviqi “nënat” e tyre” – janë disa nga pankartat që protestuesit mbajtën në duar.
Protestuesit kërkuan edhe dorëheqjen e shefes së grupit parlamentar të VV-së, Mimoza Kusari-Lila.
Ndërsa, kryetari i shoqatës “Zëri i Prindërve”, Bajram Qerkini, e mori fjalën i pari në protestën e veteranëve. Ai në fjalimin e tij emocional pati akuza të rënda për kryeministrin e Kosovës, Albin Kurti, të cilin e quajti gënjeshtar.
Qerkini tha se veteranët po trajtohen mizorisht nga kjo Qeveri, për të cilën tha se duhet “të shkojë në shtëpi”.
“O ju që po na udhëhiqni, o ju që ua dhatë votat 50%, ku jeni, çka ju vyn me ju thanë. Ju nuk e dini çka është liria, ju dini vec me na rrejtë, me na shëmtu edhe ma zi ata që na kan sëhmtu, ata të tmerrit të 98-99. Tmerr po jetojna. E kemi gzu një liri që po e dëmtojmë. Këta që po thonë veteranët nuk kanë të drejtë me pas një pagë normale, s’kanë drejt me jetu, fëmijët me i shkollu”, tha ai.
Qerkini tutje tha se kryeministri Kurti nuk mund t’i gënjejë “ata që i ka gënjyer para dy vjet e gjysme”.
“U kisha lut shqiptarë me karrika të buta duke ladru në Evropë e Botë, kthehuni popullit, ai që nuk e rahaton popullin mos u rahatoftë në jastëkun ku flen. Ti tregojmë politikës që nuk e ki mirë, kthenu popullit, e leni përrallat. Nuk mund t’i rrejt ata që i ke rrejt para 2 vjet e gjysmë, o kryeministër, edhe ata janë mbushë mend kush është Albin Kurti. Rrini të fortë, rrini qashtu qysh jeni, folni qashtu qysh keni me punu. Kjo është e vogël çka duhet me ba nëse nuk na dëgjojnë”, tha ai.
Pas 26 minutash, përfundoi protesta e veteranëve, ku pati mesazhe politike kundër Qeverisë së Kosovës. Protesta ishte paqësore, dhe nuk pati asnjë incident.
Veteranët kërcënuan me protesta të vazhdueshme nëse dekretohet Ligji për pagën minimale.
Në këtë protestë, u kërkua që veteranët e luftës të trajtohen me dinjitet.
Përveç organizatave të veteranëve të luftës, këtë protestë e përkrahën edhe disa parti politike, si PDK-ja, AAK-ja, PSD-ja e kështu me radhë.
Ata që morën fjalën kërkuan që Lëvizja Vetëvendosje të mos votohet më, teksa kryeministrin Albin Kurti e quajtën mashtrues.
Arsyeja e thirrjes së protestës është kundërshtimi i miratimit të Ligjit të Pagave, të enjten në Kuvendin e Kosovës, që i lë ata jashtë rritjes së benificionit.
Po ashtu, një nga arsyet është edhe audio-incizimi i Mimoza Kusari – Lilës dhe Slavko Simiqit, ku dëgjohet Kusari duke folur për veteranët dhe për listat e tyre.