Qeveria e Kosovës ka publikuar agjendën e mbledhjes së përbashkët të qeverive të Kosovës dhe Shqipërisë që do të mbahet të mërkurën e 14 qershorit në Gjakovë.
Qeveria ka bërë të ditur se delegacioni nga Shqipëria do të arrijë nga ora 11:00 në “Bibliotekën e Qytetit”, ndërsa nga ora 11:15 do të arrijë kryeministri i Shqipërisë, Edi Rama.
Sipas agjendës, sesioni plenar do të hapet nga ora 11:30, ndërsa ceremonia e nënshkrimit të marrëveshjeve ndërqeveritare do të mbahet nga ora 12:45 te Teatri i Qytetit “Hadi Shehu”.
Ndërsa nga ora 13:15, është paraparë konferenca e përbashkët e kryeministrit të Kosovës, Albin Kurti dhe kryeministrit të Shqipërisë, Edi Rama.
Pastaj në ora 13:45 do të vijohet me Homazhe te Lapidari i Dëshmorëve të Gjakovës.
Në ora 14:00, sipas agjendës, do të ketë drekë zyrtare shtruar kryeministri Kurti, në nder të kryeministrit të Shqipërisë, Edi rama dhe delegacioneve të dy qeverive.
Ndërkaq në ora 16:00, të dy liderët do t’i vizitojnë kryetarët e komunave të zonave kufitare, si Gjakova, Peja, Deçani, Dragashi, Tropoja, Kukësi dhe Hasi.
