Një punëtore e KEDS-it (63 vjeçare), është gjetur pa shenja jete në vendin e punës, në Gjilan, të martën e katër tetorit.
Kështu ka bërë të ditur për Portalin Dukagjini, zëdhënësi i policisë për rajonin e Gjilanit, Ismet Hashani.
“Më katër tetor, 2022, rreth orës 10:32, nga Emergjenca Rajonale në Gjilan jemi njoftuar se është sjellë një person i gjinisë femërore shqiptare-kosovare, e moshës 63 vjeçe pa shenja jete. E njëjta është punëtore e KEDS-it dhe ka qenë në vendin e punës, është gjetur në zyrë pa shenja jete”, ka thënë Hashani.
Ai ka bërë të ditur se në vendin e ngjarjes kanë dalë njësitet relevante.
“Mjeku ka konstatuar për vdekje të natyrshme”, shtoi Hashani.
Sipas tij, prokurori i shtetit ka urdhëruar që trupi i pajetë të dërgohet në institutin e Mjekësisë Ligjore për obduksion.