E kishte temë kyçe e pjesë të rëndësishme të fushatës por Lëvizja Vetëvendosje tani për gjendjen në minierën e Trepçës fajin po ua lë partive e qeverisjeve të kaluara.
Megjithëse në 2021-n u premtuan rreth 70 milionë euro investime, tani pas një defekti në kabllo ishin jashtë funksionit disa horizonte në Stan Tërg.
Për të gjitha këto, ministrja e Ekonomisë, Artane Rizvanolli tha se intervenuan shpejt por la fajtorë investimet në të kaluarën duke pretenduar se që nga paslufta në Trepçë kanë hyrë mbi 100 milionë euro por që ‘një pjesë e madhe e tyre me gjasë janë avulluar’.
Të martën, Ministria e Ekonomisë nuk është përgjigjur në pyetjet shtesë të televizionit për gjendjen në këtë ndërmarrje e as pretendimet e ministres Rizvanolli.
Ish-udhëheqësit e Trepçës megjithatë i konsiderojnë të pavend këto deklarime dhe përgjegjësinë ia hedhin qeverisë aktuale.
“Qeveria Kurti dhe ministrja Rizvanolli, kanë premtu 74 milion euro investime në Trepcë dhe asgjë nuk ka ndodhë. Asnjë zhvillim nuk ka ndodh më ndryshe se qeveritë e kaluara. Qeveritë e kaluara e kemi bërë Treçen nga AKM-ja në AKP dhe nga AKP-ja në Qeveri të Kosovës. Ja kemi lanë 80% pjesë të aksioneve. Qeveria nuk ka bërë as një veprim që këtë ligj ta zbatojë e lë më investime”, ka thënë Ferat Shala, ish-drejtor i Trepçës.
Derisa qeveria e opozita fajësojnë njëra-tjetrën, udhëheqësit aktual të Trepçës pranojnë se gjendja është e rëndë dhe nuk ka pasur e nuk investime në teknologji e mjete pune të ndërmjarrjes.
“Nuk mund ta mohojmë faktin e teknologjisë së vjetruar. Ne kemi vetëm një kamion nëntokësorë dhe s’kemi tjetër , nuk kemi ripërtërije të investimeve kapitale dhe pa to ne s’mundemi të rrisim prodhimin, Duhet pajisje e rivitalizim të mjeteve në mënyrë që të kemi prodhim më të madh”, ka thënë Bahri Hyseni, kryetar i Bordit të Ndërmarrjes “Trepça”.
Ndërkaq, shkaku i reshjeve të shiut të javëve të kaluara, aktualisht jashtë funksionit është horizonti i njëmbëdhjetë i minierës.