Pas tërheqjes së forcave ruse nga Ukraina, presidenti rus, Vladimir Putin, ka kërcënuar se do t’i kthehet armëve bërthamore.
Në fjalimin e javës së kaluar, ai paralajmëroi se “Në rast të një kërcënimi për integritetin territorial të vendit tonë dhe për të mbrojtur Rusinë dhe popullin tonë, ne me siguri do të përdorim të gjitha sistemet e armëve që kemi në dispozicion. Ky nuk është një bllof.”
Ndërsa, sipas Federatës së Shkencëtarëve Amerikanë, sistemet ruse të armëve përfshijnë 4 mijë e 477 mbushje bërthamore të vendosura dhe rezervë, me rreth 1 mijë e 900 prej tyre që janë koka luftarake “jostrategjike”, të njohura ndryshe si armë bërthamore taktike.
Sipas arkivave të qeverisë amerikane, shpërthimet fillestare në Hiroshima dhe Nagasaki kanë vrarë rreth 105 mijë njerëz, dhe dhjetëra mijëra të tjerë vdiqën më vonë nga rrezatimi i lëshuar.
Alex Wellerstein, drejtor i studimeve të shkencës dhe teknologjisë në Institutin e Teknologjisë “Stevens” në Nju Xhersi, ka thënë se ndryshimi i vërtetë në armët bërthamore nuk është në atë që është rendimenti i tyre shpërthyes, por në cilat janë objektivat e tyre, raporton CNN.
“Bombardimet atomike në Japoni kishin qenë sulme ‘strategjike’ që synonin kryesisht shkatërrimin e moralit dhe terrorizimin e komandës së lartë japoneze për t’u dorëzuar”, shkroi Wellerstein në blogun e sigurisë Outrider.
Ndërsa, sa i përket ndryshimit mes armëve bërthamore të zakonshme dhe atyre taktike, ish-Sekretari e Mbrojtjes i SHBA-së, James Mattis, ka thënë se nuk dallojnë.
“Unë nuk mendoj se ka ndonjë gjë të tillë si një ‘armë bërthamore taktike'” ka thënë ai.