Zëvendëskryeministri i Kosovës, Besnik Bislimi, është takuar me përfaqësuesin Special të BE-së, Miroslav Lajçak.
Nga Qeveria e Kosovës, përmes një komunikate për media, kanë konfirmuar se nuk ka pasur takim trilateral me kryenegociatorin e Serbisë, Petar Petkoviq.
Në këtë komunikatë thuhet se në këtë takim janë trajtuar tema të cilat ndërlidhen me zbatimin e Marrëveshjes Bazike të 27 shkurtit, Aneksit Implementues të 18 marsit dhe planin e ri për ecjen përpara të 21 tetorit.
“Ky ishte takimi vijues i procesit pas atij të 26 tetorit me liderët e Gjermanisë, Francës, Italisë dhe BE-së, ku Republika e Kosovës theksoi qëndrimet e saj, si dhe gatishmërinë për nënshkrim dhe zbatim të plotë të marrëveshjeve. Draft-propozimi për zbatim të nenit 7 ndërlidhur me nenin 10, nuk ishte pjesë e diskutimeve, por u ritheksua qëndrimi i kryeministrit Kurti të paraqitur më 26 tetor para liderëve, që nënkupton se ecja tutje duhet bërë në pajtim me parimin se vetëm nënshkrimi nënkupton pranim dhe zbatim të marrëveshjeve”, thuhet në komunikatën për media.
Në takim është diskutuar mbi planin e sekuencimit të zbatimit dhe u paraqitën komentet që sipas Qeverisës insistojnë në zbatim të plotë të Marrëveshjes Bazike.
“U trajtuan dhe marrëveshjet të cilat kanë hasur në pengesa e moszbatueshmëri në proces nga pala serbe, siç janë ajo e energjisë dhe çështja e personave të zhdukur me dhunë. Kosova u pajtua me draftin e dokumentit për termat e referencës për zbatimin e Deklaratës mbi Personat e Pagjetur, pas pranimit nga ana e BE-së të komentit tonë”, thuhet tutje në komunikatë.