Të premten e 2 shtatorit, në samitin e radhës të nismës rajonale “Open Balkan” në Beograd në Serbi, në fjalimin e tij, kryeministri i Shqipërisë, Edi Rama ka thënë se zgjidhja e lëvizjes së lirë në mes të Kosovës dhe Serbisë me karta identiteti është zgjidhje e Ballkanit të Hapur.
“Dje mund të kishte qenë një ditë krejt tjetër, dita e djeshme tregoi qartë se cila është zgjidhja e Ballkanit të Hapur”, ka deklaruar Rama.
Sipas tij, nëse Kosova do ishte pjesë e Ballkanit të Hapur, nuk do kishte nevojë për gjithë ato tensione.
“Dje mund të kishte qenë një ditë tjetër, ku mediat tona dhe të Evropës të ishin të mbushura me lajme për atë që ndodh në kufirin në mes të Serbisë dhe Kosovës”.
Rama ka falënderuar presidentin e Serbisë, Aleksandër Vuçiq, duke thënë se “Vuçiq ka dhënë një sinjal shumë të qartë për të gjithë, që zgjidhja e parë është paqja”.
Sipas tij, paqja është rruga për të arritur deri te një zgjidhje.
Po ashtu, në këtë samit, në fjalën e tij hyrëse, presidenti serb, Vuçiq ka thënë se krijimi i korridoreve të gjelbra përmes Ballkanit të Hapur për transportin e produkteve ushqimore është një arritje.
Ndër të tjera, ai ka përmendur si arritje edhe hapjen e negociatave nga BE për Shqipërinë dhe Maqedoninë e Veriut, duke thënë “Shpresoj që kjo arritje të na mundësojë të flasim me një zë të vetëm për rajonin tonë”.
Ai ka thënë gjithashtu se duhet të ketë bashkëpunim në mes të vendeve për zgjidhjen e krizës energjetike që ka kapluar rajonin dhe gjithë Evropën.