Kryetari i Komunës së Prishtinës, Përparim Rama, së bashku me stafin e Komunës së Prishtinës, gjatë ditës së diel, kanë dalë për të shëtitur me biçikleta nëpër rrugët e kryeqytetit.
Këtë Rama, e ka bërë të ditur nëpërmjet postimit në rrjetin e tij social Facebook, i cili ka deklaruar se janë duke punuar për lirimin e trafikut në kryeqytet.
“Jemi duke punuar fort për lirimin e trafikut në Kryeqytet, andaj i inkurajoj qytetarët të fillojnë të përdorin transportin alternativ, biçikletën, për në mirën e ambientit dhe shëndetit të të gjithëve”, ka shkruar Rama.
Në fund të shkrimit të tij kryetari i komunës së Prishtinës, dha moton se “Prishtina po frymon”.
Ai në postimin e tij gjithashtu inkurajoi edhe qytetarët duke iu bërë thirrje të dalin me biçikleta.
“Merre biçikletën e dil!’ E shijuam tej mase xhiron e sotme bashkë me Marakli t’Biçiklave rreth e qark Unazës” ka shtuar Rama.
Ndryshe Komuna e Prishtinës mori vendim që të shtunën ta testojë shndërrimin e gjithë unzës qendrore të kryeqytetit në qarkore njëkahëshe për automjetet, madje kjo gjë vazhdoi edhe gjatë ditës së diel.