Raportuesja për Kosovën në Këshillin e Evropës, Dora Bakoyannis, i ka rekomanduar Këshillit të Ministrave pranimin e Kosovës në Këshill të Evropës, përmes një raporti.
Bakoyannis u ka kërkuar ministrave të Këshillit të Evropës, që me 27 mars të votohet raporti i saj për Kosovën për anëtarësim në KiE.
Ajo në raportin e saj të cilin e ka siguruar Dukagjini, ka rekomanduar që Kosova aty të pranohet me emrin Kosova, pa u përmendur Republika.
Edhe pse Kosova ka zbatuar vendimin rreth pronës së Manastirit të Deçanit, po i kërkohet që të bëjë themelimin e Asociacionit të Komunave me shumicë serbe.
“ Autoritetet duhet të braktisin kundërshtimin e tyre për themelimin e një asociacioni të komunave me shumicë serbe dhe të hyjnë në negociata në mirëbesim për themelimin e një asociacioni të tillë”, thuhet në raport.
Në këtë raport Kosovës i kërkohen disa hapa në fushën e drejtësisë:
- Të zbatojë pa vonesa të mëtejshme aktgjykimin e Gjykatës Kushtetuese në rastin Mansastirit të Deçanit;
- Respektimi i plotë i pavarësisë së gjyqësorit, duke përfshirë edhe përmbajtjen nga kritikat e panevojshme që minojnë besimin në gjyqësor;
- Të vazhdojnë përpjekjet e tyre për reformimin e gjyqësorit, në bashkëpunim me Këshillin e Evropës dhe duke respektuar plotësisht standardet e Këshillit të Evropës;
- Të ndërmarrë hapat e nevojshëm për të siguruar që kërkesat pronësore nga refugjatët dhe PZHBV-të të gjykohen brenda një kohe të arsyeshme;
- Të vazhdojnë përpjekjet e tyre për të luftuar korrupsionin dhe krimin e organizuar dhe të sigurojnë zbatimin e duhur të legjislacionit të ri në këtë fushë;
- Të përmbahen nga forcat e posaçme policore në Kosovën veriore për të kryer detyra të zakonshme policore dhe për të siguruar që forcat e tilla të shpërndahen vetëm aty ku është e nevojshme dhe në koordinim të ngushtë me KFOR-in dhe EULEX-in.
Ndërsa, lidhur me respektimin e të drejtave të njeriut, duke përfshirë të drejtat e pakicave, sipas këtij raporti, autoritetet duhet në veçanti:
- Të sigurojë qasje efektive në arsimin fillor dhe të mesëm dhe tekste shkollore cilësore për të gjithë fëmijët, duke përfshirë fëmijët me aftësi të kufizuara dhe fëmijët që u përkasin grupeve të tjera të pafavorizuara si romët, ashkalitë dhe egjiptianët;
- Të adresojë urgjentisht mungesën e një qasjeje gjithëpërfshirëse dhe të koordinuar për çështjet dhe të drejtat e pakicave. Një qasje e tillë duhet të zhvillohet dhe të zbatohet në bashkëpunim me të interesuarit dhe në mënyra që pasqyrojnë nevojat specifike të komuniteteve të ndryshme;
- Të adresojë problemet e vazhdueshme në zbatimin dhe monitorimin e legjislacionit gjuhësor, duke përfshirë në nivel komunal dhe të sigurojë si çështje prioritare forcimin ligjor, pavarësinë, burimet e duhura dhe vazhdimësinë e funksionimit të Komisionerit Gjuhësor.
- miratimi i strategjive konkrete për dialogun ndërmjet komuniteteve dhe për hapësirat dhe aktivitetet e orientuara drejt pajtimit, veçanërisht në arsim, me qëllim që të hapet rruga për zhvillimin dhe besimin gjithëpërfshirës të shoqërisë.
Kurse te pjesa e opnionit, përmendet se Kosova aplikoi për anëtarësim në Këshillin e Evropës më 12 maj 2022 me letrat e nënshkruara nga znj Donika Gërvalla-Schëarz.
Po ashtu kërkohet nga Kosova miratimi i një varg ligjesh.