Rasti i Salih Mustafës, i cili u dënua me 22 vjet burgim, nga Gjykata Speciale do kthehet në Gjykatën e Apelit.
Sipas njoftimit “Në kërkesën e tij për mbrojtje të ligjshmërisë z. Mustafa ngriti pesë pika, të cilat lidheshin me përkthimin e aktgjykimit të apelit në gjuhën shqipe, shpalljen e tij fajtor për vrasje si krim lufte, si edhe me masën e dënimit”.
Supremja me këtë rast ia ktheu cështjen përsëri Apelit për ta shqyrtuar uljen e dënimit.
“Më 29 korrik 2024, Paneli i Gjykatës Supreme lëshoi vendim mbi kërkesën e Sali Mustafës për mbrojtje të ligjshmërisë, e cila u paraqit pas lëshimit të aktgjykimit të apelit në çështjen e tij. Në kërkesën e tij për mbrojtje të ligjshmërisë z. Mustafa ngriti pesë pika, të cilat lidheshin me përkthimin e aktgjykimit të apelit në gjuhën shqipe, shpalljen e tij fajtor për vrasje si krim lufte, si edhe me masën e dënimit.
Paneli i Gjykatës Supreme e miratoi pjesërisht kërkesën e tij dhe anuloi pjesën e aktgjykimit të apelit që ka të bëjë me dënimin e z. Mustafa me 22 vjet burg.
Paneli i Gjykatës Supreme ia ktheu çështjen përsëri Panelit të Apelit në përputhje me rregullën 194(1)(b) të Rregullores, për të shqyrtuar uljen e dënimit bazuar në arsyetimin e paraqitur në vendimin e Panelit të Gjykatës Supreme”, thuhet në njoftim.
Në vendim thuhet se Apelit duhet ti jepet mundësia për ta rivlerësuar nëse dënimi me 22 vjet për Salih Mustafën është ende i arsyeshëm.
“Paneli rikujton se rregulli 163 i Rregullores kërkon që të merret parasysh një gamë e gjerë faktorësh gjatë përcaktimit të një dënimi. Duke pasur parasysh këtë, Paneli konstaton se Kolegji i Apelit është në gjendje më të mirë për të përcaktuar dënimin e duhur për z. Mustafa, pasi që më parë ka shqyrtuar procesverbalin e rastit në detaje dhe ka analizuar arsyet e ankesës së z. Mustafa në këtë drejtim. Prandaj, Kolegji e anulon Aktgjykimin e Apelit vetëm për aq sa ka të bëjë me dënimin e z. Mustafa në pajtim me rregullën 194(1)(b) të Rregullores, dhe ia kthen aktgjykimin e Apelit Kolegjit të Apelit për një vendim të ri mbi të. Kolegji është i mendimit se Kolegjit të Apelit duhet t’i jepet mundësia për të rivlerësuar nëse dënimi me 22 vjet burgim i z. Mustafa është ende i arsyeshëm në dritën e diapazonit të dënimit të identifikuar dhe jurisprudencës së analizuar”, thuhet në vendim.
Sipas vendimit Paneli ka konstatuar se Kolegji i Apelit e ka shkelur ligjin penal.
“Duke pasur parasysh sa më sipër, Paneli pranon arsyet 1 dhe 3 të kërkesës së z. Mustafa. Paneli konstaton se Kolegji i Apelit ka shkelur ligjin penal duke dështuar në: (i) identifikimin e ligjit përkatës të Kosovës në përputhje me nenin 44(2)(b) të Ligjit dhe siç kërkohet nga parimi i lex mitior; (ii) të identifikojë diapazonin e zbatueshëm të dënimit dhe (iii) të arsyetojë siç duhet se si arriti në uljen e dënimit të z. Mustafa me katër vjet”, thuhet në vendim.