Pesë objekte të ndërtuara pa leje në pronë publike, në afërsi të Liqenit të Radoniqit, janë rrënuar sot nga Inspektorati Mjedisor.
Lajmin e ka bërë të ditur ministrja e Mjedisit dhe Planifikimit Hapësinor, Fitore Pacolli, përmes një postimi në Facebook.
“5 objekte të ndërtuara pa leje në pronë publike te Liqeni i Radoniqit janë rrënuar sot nga Inspektorati Mjedisor. Pronat publike dhe hapësirat tona natyrore do të mbrohen me vendosmëri”, ka shkruar Pacolli.
Ajo ka thënë se aksione të tilla do të vazhdojnë me qëllim të vendosjes së ligjshmërisë dhe mbrojtjes së pronave ujore, burimeve të ujit të pijshëm dhe natyrës së Kosovës.
“Uji është pasuri që duhet ta mbrojmë për qytetarët dhe gjeneratat e ardhshme”, ka theksuar Pacolli.