Ekonomia më e madhe e Evropës, Gjermania është duke u përpjekur që të kompensojë mungesat e energjisë që po vijnë si pasojë e reduktimeve të gazit nga ana e Rusisë.
Sa i përket kësaj, kancelari gjerman Olaf Scholz ka thënë se Gjermania duhet të mbajë në punë tri centralet bërthamore, pasi janë ekskluzivisht të rëndësishme për prodhimin e energjisë elektrike.
Zgjatja e jetëgjatësisë së termocentraleve ka shkaktuar një debat të ashpër në Gjermani, ku energjia bërthamore ka qenë prej kohësh e diskutueshme, pasi këto uzina atomike ishin paralajmëruar të mbylleshin më 31 dhjetor të këtij viti, shkruan Le Monde.
Çështja ka ndarë koalicionin qeverisës, me socialdemokratët e Scholz-it dhe të gjelbrit deri tani që janë skeptikë, dhe FDP që favorizon një zgjatje të tillë.
Ai, gjithashtu, akuzoi Rusinë për bllokimin e një turbine të nevojshme për të mbajtur gazin të rrjedhë përmes gazsjellësit Nord Stream 1 në Evropë.
Gjermania, e cila është shumë e varur nga gazi rus, e ka cilësuar vendimin për të kufizuar furnizimet si një përgjigje “politike” mbi mbështetjen e Perëndimit për Ukrainën.
Scholz tha se masa e Moskës për të kufizuar furnizimet dërgoi një “mesazh të vështirë” për botën duke krijuar dyshime mbi angazhimin e Rusisë ndaj marrëveshjeve të saj.
Gjithashtu, Gjermania tashmë ka bërë lëvizjet për të rifilluar termocentralet e qymyrit për t’u mbrojtur nga mungesa e energjisë.