Federata e Futbollit të Serbisë është gjobitur nga FIFA të mërkurën për deklarata politike të bëra në kuadër të Kupës së Botës që po mbahet në Katar.
Serbia u dënua me 20 mijë franga, për shkak të vendosjes së flamurit me simbolike politike e të urrejtjes në dhomat e zvheshtorës para lojës me Brazilin të cilën e humbën 2:0.
Në atë flamur shihej harta e Kosovës me simbole të Serbisë, e që si e tillë përmban gjuhë të urrejtjes.
Federata e Futbollit të Kosovës u ankua zyrtarisht në FIFA për pankartën, e cila ishte varur mbi dollapët e dy lojtarëve të Serbisë më 24 nëntor.
Po ashtu, FIFA e gjobiti federatën kroate të futbollit me 50,000 franga zvicerane (53,000 dollarë) pasi tifozët e ekipit abuzuan verbalisht dhe talleshin me portierin kanadez Milan Borjan, i cili ka lidhje familjare serbe.