Shefi i delegacionit të BE-së në Beograd, Emanuele Giaufret, ka thënë se propozimi evropian për normalizimin e marrëdhënieve Kosovë – Serbi, është një mundësi historike.
Në një intervistë për mediumin serb “Kurir”, Giaufret ka thënë se është “lajm i shkëlqyer që presidenti i Serbisë, Aleksandar Vuçiq dhe kryeministri i Kosovës, Albin Kurti, janë pajtuar për Planin e BE-së”.
“Është i nevojshëm diskutimi i mëtejshëm për propozimin e BE-së. Megjithatë suksesi vjen me zbatimin e marrëveshjeve. Përfaqësuesi i lartë i BE-së pas takimit tha se të gjitha marrëveshjet e deritashme nga dialogu mbeten të vlefshme dhe të detyrueshme, dhe kjo natyrisht përfshin edhe themelimin e AKS-së dhe ne do të vazhdojmë të insistojmë në këtë çështje urgjente”, ka shtuar shefi i delegacionit të BE-së në Beograd.
Tutje, ai ka theksuar se “duhet të shihen anët pozitive të marrëveshjes së re, pasi sjell mundësi të reja ekonomike. Po ashtu, do të jetë një pikë kthese në procesin e integrimit të Serbisë në BE”.
Giaufret ka potencuar se emisari i BE-së për dialogun, Miroslav Lajçak, do të vazhdojë përpjekjet e tij diplomatike në Beograd e Prishtinë, për të bërë përgatitjet për takimin e radhës të nivelit të lartë
Ai është shprehur se duhet të punohet që të zbatohen të gjitha marrëveshjet.