Bordi i Drejtorëve të Kompanisë për Operimin e Sistemit të Transmetimit të Kosovës (KOSTT) ka marrë një vendim në takimin e tij të mbajtur më 24 prill, duke shkarkuar kryeshefin ekzekutiv, Evetar Zeqirin.
Në vend të tij, bordi ka emëruar Shaban Nezirin, zëvendës kryeshef ekzekutiv, si ushtrues detyre të kryeshefit ekzekutiv deri në marrjen e një vendimi tjetër.
“Ju njoftojmë që Bordi i Drejtorëve të KOSTT sh.a në takimin e mbajtur me 24 Prill 2024, në bazë të kompetencave dhe përgjegjësive në përputhje me Ligjin për Ndërmarrjet Publike dhe Statutin e kompanisë, ka marrë vendim që të ndërpresë marrëdhënien e punës të Kryeshefit Ekzekutiv të KOSTT z.Evetar Zeqiri. Me këtë rast, Bordi ka emëruar z. Shaban Neziri, zëvendës Kryeshef Ekzekutiv, si ushtrues detyre i Kryeshefit Ekzekutiv të KOSTT sh.a, deri në marrjen e një vendimi tjetër.
Z. Shaban Neziri, me profesion Inxhinier i Elektroteknikës, është pjesë e KOSTT që nga themelimi i saj dhe gëzon një përvojë të gjatë profesionale brenda kompanisë.
KOSTT mbetet i përkushtuar ndaj garantimit të sigurisë në operimin e Sistemit të Transmetimit të Republikës së Kosovës”, thuhet në njoftimin e KOSTT-it, disa orë pasi Dukagjini raportoi se Evetar Zeqiri është shkarkuar.