Shpallen fituesit, “Dukagjini” shpërblen fëmijët në garën e vizatuesve të vegjël

Shtëpia botuese “Dukagjini” në këtë fundvit ka shpërblyer fëmijët, duke e mbyllur në mënyrën më të mirë të mundshme garën për vizatuesit e vegjël

Ilustrim

Shtëpia botuese “Dukagjini” në këtë fundvit ka shpërblyer fëmijët, duke e mbyllur në mënyrën më të mirë të mundshme garën për vizatuesit e vegjël.

Të gjithë fëmijët pjesëmarrës në garë janë shpërblyer me nga një libër, botime të shtëpisë botuese “Dukagjini”.

Ilustrim

E, përveç kësaj, në një ceremoni që është mbajtur të shtunën në librarinë “Dukagjini”, janë ndarë edhe shpërblimet për fëmijët që janë vlerësuar me tri vendet e para nga juria profesionale, si dhe një çmim i publikut, në garën e hapur përmes rrjeteve tona sociale.

Me vendin e parë, juria ka vlerësuar punimin e 5-vjeçares Roza Veselaj, që ka zgjedhur të vizatojë një insert nga libri “Tregimi i lepurit Piter”. Juria e ka vlerësuar punimin e 5-vjeçares për origjinalitetin dhe kreativitetin e shprehur në këtë vizatim, duke marrë parasysh edhe moshën e saj.

Roza është shpërblyer me dy sete lektyrash, që do ta presin për t’i lexuar në klasën e parë dhe të dytë, si dhe me një set prej 6 librash nga autori shumë i dashur për fëmijët, Gianni Rodari, të gjitha botime të shtëpisë botuese “Dukagjini. Pra, gjithsej 16 libra si shpërblim i vendit të parë.

Vizatimi i realizuar nga Roza Veselaj, vendi i parë

Me vendin e dytë, sipas vlerësimit të jurisë, është shpërblyer punimi i 8-vjeçares Borë Alimusaj, që ka vendosur të paraqesë grindjen e stinëve, motiv nga libri “Bletëzat” i Drenusha Zajmi-Hoxhës. Punimi i Borës është i pastër dhe me shumë ngjyra, njëkohësisht shumë kreativ dhe origjinal. Shpërblimi i vendit të dytë ka marrë dy sete lektyrash, gjithsej 10 libra.

Punimi i realizuar nga Bora Alimusaj, vendi i dytë

Punimi i realizuar nga Era Pylla, një insert nga personazhi i veprës “Lepurushi prej Pushi” i autores Margery Williams është shpërblyer me vendin e tretë. Asaj i ka takuar një set lektyrash me 5 libra.

Punimi i realizuar nga Era Pylla

Juria profesionale ka qenë në përbërje të profesores së artit figurativ, Mirlinda Ramadani, si dhe ilustratoreve e disenjatoreve të shtëpisë botuese, Diellza Gojani dhe Jeta Sokoli. Ato kanë vlerësuar punimet e fëmijëve me pikë, në mënyrë të pavarur nga njëra-tjetra.

Përveç jurisë, shpërblim i është ndarë edhe vizatueses Menesë Krasniqi, punimi i së cilës ka marrë plot 539 pëlqime në faqen zyrtare të shtëpisë botuese “Dukagjini” në Facebook. Menesës i kanë takuar dy komplete librash për fëmijë.

Punimi i realizuar nga Menesa Krasniqi

Seria e plotë e librave me të cilët janë shpërblyer fëmijët janë: seti i lektyrave për klasën e parë: “Tregimi i lepurit Piter” nga Beatrix Potter, “Bletëzat” nga Drenusha Zajmi-Hoxha, “Përralla popullore mbi kafshët” nga Bedri Dedja, “Rrëfenja” nga Vëllezërit Grim dhe “Maçoku me çizme dhe përralla të tjera” nga Charles Perrault; seti i lektyrave për klasën e dytë: “Shkolla e pyllit” nga Bedri Dedja, “Vjersha” nga Agim Deva, “Lepurushi prej pushi” nga Margery Williams, “Përralla e postierit” nga Karel Čapek dhe “Përralla të zgjedhura nga Hans Christian Andersen, si dhe seti i librave për fëmijë i autorit italian Gianni Rodari, të botuara nga “Dukagjini”: “Shigjeta e kaltër”, “Planeti i pemëve të Krishtlindjeve”, “Atalanta”, “Punët e zotit maçok”, Agjenti X.99” dhe “Mes bankash”.

Qëllimi i kësaj gare ishte që të nxiten fëmijët që të përdorin imagjinatën e tyre, që pasi të kenë lexuar një libër vetë ose me ndihmën e prindërve apo kujdestarëve të tyre, të paraqesin në letër atë që kanë kuptuar.

I kemi pranuar rreth 35 punime në adresë të “Dukagjinit”, gjatë afatit të përcaktuar për pranimin e punimeve. Ekipi i “Dukagjini”-t është shumë i kënaqur me rezultatin e arritur, duke shpresuar që kemi kontribuuar në rritjen e interesimit jo vetëm për librin, por edhe për mendimin kritik dhe analitik. “Dukagjini” e sheh tejet të rëndësishme idenë e kultivimit të leximit në fazat e hershme të zhvillimit të fëmijëve, andaj, në këtë drejtim, investon shumë me kapacitetet e veta.

Shija e redaktorit

Spanja në finale, mposht Francën

Kombëtarja e Spanjës ka arritur kualifikimin në finale të Euro 2024, pasi mposhti me rezultat 2:1 kombëtaren e Francës në gjysmëfinale. Në pjesën e dytë...

Ballkani triumfon në ndeshjen e parë kualifikuese në Ligën e...

Ballkani ka fituar 2-1 ndaj Santa Coloman në 1/8 e fazës kualifikuese në Ligën e Kampionëve. Ndeshja nisi me një ritëm të qetë, por që...

Blinken duartroket rolin e Osmanit për hapjen e qendrës rajonale...

Sekretari amerikan i Shtetit, Antony Blinken, ka vlerësuar rolin e presidentes së Kosovës, Vjosa Osmani, në hapjen e qendrës rajonale “Gratë, Paqja dhe Siguria”...

Të fundit nga rubrika