Pas marshimit të mbajtur të dielën e 2 prillit në sheshet e Prishtinës, këtë të hënë është duke u mbajtur një protestë në Hagë, aty ku ndodhet selia e Gjykatës Speciale.
Tashmë shqiptarët e diasporës janë mbledhur para Gjykatës Speciale në mbështetje të ish-krerëve të UÇK-së, pak para se të hapet gjyqi i tyre për krime lufte dhe krime kundër njerëzimit.
Nën brohoritjet “UÇK, UÇK”, “O Hashim, ti ku je, krejt Kosovës këtu e ke”, shqiptarët e diasporës në Hagë kanë nisur protestën.’
Në mesin e shumë protestuesve në Hagë, ndodhet edhe djali i Kadri Veselit, Klestori.
Ai me qindra bashkatdhetarë të tjerë, janë mbledhur për të protestuar kundër gjykimit të ish-krerëve të UÇK-së në Gjykatën Speciale të Hagës.
Çfarë do të ndodhë sot në Hagë?
Në Dhomat e Specializuara në Hagë këtë të hënë do të nisin deklaratat hyrëse në rastin gjyqësor ndaj katër ish-krerëve të Ushtrisë Çlirimtare të Kosovës.
Prokurori i specializuar fillimisht do të mbajë deklaratën e tij. Gjyqtarët i kanë caktuar atij një afat prej pesë orësh për ta mbledhur rastin që synon ta paraqesë.
Pas kësaj, avokati i viktimave do të mbajë fjalën e tij, të cilit i është caktuar një afat prej 45 minutash.
Në ditët në vijim do të mbahen edhe avokatët mbrojtës të ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi.
Lokacionet për krimet e dyshuara
Në aktakuzën e Prokurorit të Specializuar ndaj ish-krerëve të UÇK-së përmenden 40 lokacione ku dyshohet se u kryen krime.
Po ashtu, aty përmenden më shumë se 400 persona që dyshohet se janë ndaluar jashtëligjshëm, 102 të vrarë dhe 20 të zhdukur.
Çfarë është Gjykata Speciale?
Dhomat e Specializuara dhe Zyra e Prokurorit të Specializuar të Kosovës, me seli në Hagë, janë krijuar pas votimit më 2015 nga deputetët e Kuvendit të Kosovës.
Ky institucion që njihet edhe si Gjykata Speciale, heton krimet e pretenduara të pjesëtarëve të UÇK-së, të kryera ndaj pakicave etnike dhe rivalëve politikë nga janari i vitit 1998 deri në dhjetor të vitit 2000.
Kujtojmë se prej nëntorit të vitit 2020, ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi, gjenden në paraburgim në Hagë të Holandës.