Ministria e Mbrojtjes e Suedisë ka njoftuar se do të ofrojë ndihmë ushtarake në vlerë prej rreth 680 milionë dollarësh për Ukrainën.
Ky vendim shënon herën e 15-të që Suedia i jep ndihmë Ukrainës, dhe pakoja më e madhe e ndihmës deri më sot, duke rritur në rreth 2.8 miliardë dollarë ndihmën e përgjithshme që ia ka dhënë asaj prej se Rusia e filloi pushtimin e saj më 2022.
Ministri i Mbrojtjes i Suedisë, Pal Jonson, ka konfirmuar këtë ndihmë duke shtuar se ata do të vazhdojnë të mbështesin Ukrainën sa të jetë e nevojshme. Pakoja e ndihmës përfshin artileri, municion të artilerisë, anije detare luftarake dhe pajisje të tjera të nevojshme për forcat ushtarake ukrainase.
“Ne do të vazhdojmë ta mbështesim Ukrainën sa të jetë e nevojshme”, ka thënë ministri Jonson.
Ky vendim vjen menjëherë pasi presidenti i Ukrainës, Volodymyr Zelensky, ka bërë një thirrje për ndihmë gjatë një vizite te trupat ukrainase në vijën e frontit.
Zelensky ka bërë të ditur se ushtria ukrainase po përballet me kushte tejet të vështira dhe mungesë municioni në vijat e frontit.
“Kjo gjendje është tejet e vështirë tani në disa pjesë të vijës së frontit, ku trupat ruse kanë vendosur rezerva maksimale”, ka deklaruar Zelensky më 19 shkurt pas një vizite te trupat ukrainase në vijën e frontit në qytetin verilindor, Kupianks.
Rënia e Avdivkës, dikur qytet i rreth 30.000 banorëve, por tani kryesisht i bërë rrafsh me tokën dhe shkretëtirë, në rajonin lindor të Donjeckut, shënon fitimin më të madh territorial të Rusisë në nëntë muajt e fundit prej se e nisi pushtimin e Ukrainës para gati dy vjetëve.