Kremlini tha të premten se një sulm ukrainas kundër një depoje karburanti në qytetin rus të Belgorodit nuk krijoi kushte komode për të vazhduar bisedimet e paqes me Kievin.
Rusia akuzoi Ukrainën të premten se kishte sulmuar depon, por autoritetet ukrainase nuk iu përgjigjën menjëherë kërkesave për ndonjë reagim.
Duke folur me gazetarët në një konferencë, zëdhënësi i Kremlinit Dmitry Peskov tha se autoritetet po bënin gjithçka për të riorganizuar zinxhirin e furnizimit me karburant dhe për të shmangur ndërprerjen e furnizimit me energji në Belgorod.
Dy helikopterë ukrainas me fluturim të ulët kaluan në territorin rus të premten herët dhe qëlluan mbi një depo nafte në qytetin e Belgorodit, tha një zyrtar rus, hera e parë që Rusia raporton një sulm ajror ukrainas në territorin e saj që nga fillimi i luftës.
Sulmi dukej se ishte një siklet për ushtrinë ruse, e cila tha javën e kaluar se forcat ajrore të Ukrainës ishin “shkatërruar praktikisht“.
Ushtria e Ukrainës më parë kishte arritur të godiste territorin rus vetëm me raketa të lëshuara nga toka.
Edhe pse nuk ishte e mundur të përcaktohej nëse helikopterët ishin ukrainas, pamjet nga mediat ndërkombëtare konfirmuan se një sulm ajror shkaktoi zjarr në vend.
Dy persona u plagosën në këtë zjarr, sipas guvernatorit të rajonit, Vyacheslav Gladkov.
“Zjarri në depon e naftës ndodhi si rezultat i një sulmi ajror të dy helikopterëve të Forcave të Armatosura të Ukrainës që hynë në territorin e Rusisë në lartësi të ulët”, tha zoti Gladkov në një postim në rrjetet sociale të premten.
Zjarrfikësit, shtoi ai, “po përpiqen ta lokalizojnë sa më shpejt zjarrin. Asgjë nuk kërcënon popullsinë.”
Belgorod, i cili ka një popullsi prej rreth 400 mijë banorësh, ndodhet më pak se 20 milje nga kufiri ukrainas. Rajoni, në javët e fundit, ka qenë një terren për trupat ruse që hyjnë në Ukrainën lindore.