Ministri i Punëve të Brendshme, Xhelal Sveçla, u ka bërë thirrje qytetarëve të Republikës së Kosovës të mos u përgjigjen thirrjeve të dyshimta për bashkëngjitje të protestës në veri.
Me anë të një postimi në Facebook, Sveçla ka thënë se këto thirrje nuk i ndihmojnë Republikës së Kosovës.
“Qytetarë të dashur, thirrjet për protestë në jug të Mitrovicës dhe me synim marshimin drejt veriut të vendit, janë të panevojshme dhe nuk i ndihmojnë Republikës së Kosovës. Përmes këtij organizimi në rrjetet sociale po tentohet të nxiten tubime të panevojshme. Sipas vlerësimeve nga institucionet e sigurisë, kjo thirrje po përhapet nga persona të panjohur dhe profile të dyshimta nëpër rrjetet sociale… I ftoj të gjithë qytetarët që të mos i përgjigjen këtyre thirrjeve të dyshimta dhe organizimeve anonime”, ka shkruar ai.
Tutje, Sveçla ka thënë se mbështetja e madhe qytetare e këtyre ditëve karshi vendimeve të Qeverisë dhe institucioneve të vendit janë garanci e vendosjes së kushtetutshmërisë dhe ligjshmërisë në veri të vendit.
Thirrjeve të Sveçlës u është bashkëngjitur edhe Policia e Kosovës.
Kjo e fundit u ka bërë thirrje qytetarëve që të lënë institucionet e sigurisë ta trajtojnë situatën me profesionalizëm.