Shefi i Grupit Parlamentar të AAK-së, Besnik Tahiri, ka deklaruar se shpërbërja e Kuvendit të Kosovës mund të ndodhë vetëm kur të shkarkohet kryeministri ose nëse ai jep dorëheqje.
“Ne sot jemi në ditën kur në Strasburg ambasadorët diskutojnë a me hy a po jo Kosova në agjendën e Komiteteve të Ministrave. Paramendoni kryeministri i vendit, një ditë para se të vendoset për anëtarësimin e Kosovës, ai merret me zgjedhje. Me të vetmen arsye me mbulu një marre, me mbulu një dështim total. Sa i përket çështjes që u bë pastaj temë mediale e shpërbërjes së parlamentit. Në shpërbërjen e parlamentit nuk e kemi diskutuar asnjë moment në Kuvendin e Kosovës. Ne si Aleancë e kemi propozuar një mocion votëbesimi në Kuvend. Shpërbërja e parlamentit për AAK-në mund të ndodhë vetëm atëherë kur kryeministri shkarkohet ose dorëhiqet”, ka thënë ai.
Tahiri në një prononcim për medie ka thënë se AAK-ja me rezultatet që do t’i ketë në zgjedhjet e ardhshme do të jetë befasi.
Kjo pasi, sipas tij, organizmi strukturor i AAK-së kurrë nuk ka qenë më i fuqishëm, as në Kosovës e as në diasporë.
“Po e them pa modesti, për shkak se organizmi strukturor i Aleancës kurrë nuk ka qenë më i fuqishëm. As në Kosovës e as në diasporë. Edhe unë mendoj që rezultati jonë do të jetë befasia e zgjedhjeve. Mirëpo shkuarja në zgjedhje përmes një marrëveshje kërkon më shumë korrektësi”, ka thënë ai.
Sa i përket takimit të mbrëmshëm në mes të kryeministrit Albin Kurti dhe kryetarit të PDK-së, Memli Krasniqi, ka thënë se në atë takim ka pasur diskutime për agjenda legjislative.
“Takimi i mbrëmshëm i ka shpërfaqë dy të vërteta të mëdha. E vërteta e parë është që në këtë takim nuk ka pasur diskutim për temën po për agjendën legjislative. Siç shihet, nuk është problem votimi i 300 milion euro të marrëveshjeve ndërkombëtare, por problemi është se si Kurti ta gjejë një dalje, të cilën mund t’ia mundësojë opozita, në mënyrë që atij t’i mundësohet një amnisti e keqqeverisjes, e dështimit në politikën e brendshme si dhe të jashtme. Mbi të gjitha, të anëtarësimit të Kosovës në KiE”, ka deklaruara ai.
Mes të tjerash, ai ka thënë se AAK-ja do të takohet me Kurtin vetëm nëse ka të bëjë me tema të interesit nacional.
“Të gatshëm për zgjedhje”, gjithçka nga takimi ndërmjet Kurtit e Krasniqit