Të paktën 45 persona janë vrarë, duke përfshirë gra dhe fëmijë, në një sulm ajror izraelit në një kamp për palestinezët e zhvendosur në qytetin jugor të Gazës, Rafah, ka thënë ministria e shëndetësisë e drejtuar nga Hamasi.
Videot nga vendi i ngjarjes në zonën Tal al-Sultan të dielën mbrëma treguan një shpërthim të madh dhe zjarre intensive që digjen.
Forcat e Mbrojtjes së Izraelit (IDF), thanë se kishin vrarë dy zyrtarë të lartë të Hamasit dhe se po shqyrtonin raportet se civilët ishin dëmtuar.
Disa orë më parë, Hamasi kishte lëshuar tetë raketa nga Rafah drejt Tel Avivit – sulmet e para me rreze të gjatë në qytetin qendror izraelit që nga janari, raporton BBC.
Incidentet erdhën dy ditë pasi Gjykata Ndërkombëtare e Drejtësisë (ICJ), urdhëroi Izraelin të ndalojë menjëherë ofensivën e tij ushtarake në Rafah, ku qindra mijëra njerëz besohet se janë ende të strehuar.
Një zyrtar i lartë në agjencinë e mbrojtjes civile të Hamasit të Gazës, Mohammad al-Mughayyir, ka thënë ndërkohë për AFP se punonjësit e shpëtimit të agjencisë kishin parë “trupa të djegur dhe gjymtyrë të copëtuara”, si dhe “raste amputimesh, fëmijë të plagosur, gra dhe të moshuar”.
Po ashtu, IDF ka thënë në një deklaratë të dielën se kishte kryer një sulm ajror në Tal al-Sultan që eliminoi dy liderë të Hamasit – Yassin Rabia, shefin e shtabit të luftëtarëve të grupit të armatosur në Bregun Perëndimor të pushtuar dhe Khaled Nagar, një tjetër zyrtar i lartë në krahun e Bregut Perëndimor.
Agjencia e OKB-së për refugjatët palestinezë, Unrwa – organizata më e madhe humanitare në Gaza – i përshkroi raportimet si “të tmerrshme” dhe ka thënë se nuk ishte në gjendje të krijonte komunikim të plotë me ekipin e saj në terren në Rafah.